旺角區搵食: 抵食的3小時海鮮火鍋+雞煲放題

之前嚟過 <新南苑> 食 <牛魔王餐雞煲火鍋放題>，覺得整體環境和食物質素都唔錯呀，兩食嚟講算係幾抵食，臨走前仲見到隔離枱食緊海鮮套餐，好吸引呀！所以今次海鮮控的我又相約friend子嚟試吓喇~

職員安排左卡位俾我地，好闊落~ 海鮮套餐+雞煲放題可以食足180分鐘，超興奮啊！

飲品和一些小食、蔬菜等都可以到自助區自取~

首先食雞煲，由唔辣到唔同辣度都有，我地揀左BB辣，啲雞每隔2分鐘炒一次，共炒3次，最後加入油炸鬼就食得，啲雞又香又滑又惹味，油炸鬼索左啲汁準勁好味，食完一轉可以叫職員再添第二round, 食到夠就可以直接轉火鍋了~

食海鮮火鍋我地比較鍾意原汁原味，所以叫左清湯湯底，湯底已經加入左幾款蔬果和菇類~

海鮮套餐包左一個時令活海鮮盤，有新鮮鮑魚、蟶子、青口、生蠔、海蝦和脆鯇片、2隻灌湯小籠包，每4位仲送一碟好嫩滑嘅手砌牛頸脊，全部都係我嘅至愛，非常吸引~

火鍋當然唔止咁少野啦～肥牛、灌湯小籠包、海蝦、龍躉片、響鈴、炸魚皮、各式丸類、麵類和餃類等近40款火鍋食材都可以無限免費追加，所以我地呢晚真係食得好盡情啊！我地已經plan定下次嘅聚會再嚟食過喇~