【師傅發板 】驚喜又高質的鐵板燒

開心!開心! 為慶祝余小b終於測完驗，我地呢日lunch拍住拖去食鐵板燒喔~

呢間元朗新開張幾個月嘅譽鐵板燒 真係好有驚喜~我地點左兩份【櫻】一人前套餐，包括多款海鮮、牛、鵝肝，仲有麵豉湯、炒飯和甜品，非常豐富而且每碟都造得十分精緻! 余小b第一次食師傅發板, 表示坐住吧枱睇師傅表演好興奮呢~

先來沙律巴馬火腿咸香美味，入面包左露筍，仲有清甜爽口嘅蓮芋、車厘茄和哈蜜瓜，配上柑橘油醋汁，清新開胃~

南非鮑魚 好彈牙鮮甜，先食原味，再伴由日本鮑魚肝製成的醬，第一次食鮑魚肝醬，又香又creamy~

日本新鮮銀雪魚配明太子汁，新鮮食材係最好味的，又滑又鮮甜，魚皮煎到卜卜脆, 邪惡得嚟好好味~

鵝肝多士 鵝肝口感嫩滑細膩，加了黑醋做topping和日本鳥取縣水晶梨，呢個配搭食落特別清新，滿有層次感, 油膩感盡消~

牛魔王見到呢碟美國封門牛柳當然勁開心啦! 七成熟入口非常香嫩, 少有用鹽昆布和即磨wasabi油醋汁伴碟, 非常驚喜~

跟著飲番碗白麵豉湯 , 迎接炒飯和甜品, 相比平日飲開嘅黑麵豉湯, 呢個白麵豉湯的確冇咁咸, 想飲多碗~

砂糖多士係呢度大受歡迎嘅甜品, 又香又脆嘅牛油多士面層鋪滿焦香嘅砂糖, 好邪惡但我鍾意~

最後, 我地食埋開心果雪糕和柚子雪巴作結, 好圓滿嘅師傅發板鐵板燒~

師傅同職員姐姐都好nice，服務周到! 余小b一向識食，呢餐由頭帶到尾，食得開心又滿足呢!

【譽鐵板燒 】
地址︰元朗屏會街9號同發大廈地下M號舖