令人回味的omakase

聖誕月同friend子提前慶祝，到黃埔 新開張嘅 <鮨龍>  食我地喜歡嘅omakase～

我地呢個【旬set】包括: 前菜、刺身、refreshing、壽司、卷物、湯和甜品，全部都用上高級食材，十分吸引~

【黑梅貝子煮】是日本嘅東風螺，不過佢好乾淨，完全沒有沙，就連佢嘅腸都可以好放心食埋，好彈牙爽口和帶海水味~

【間八魚薄切配柚子豉油】好鮮甜嘅間八魚配上柚子豉油，更顯清新~

【帆立貝和赤蝦刺身】非常爽口清甜，仲可以好有儀態咁食埋十分香濃幼滑嘅蝦膏，好特別~

【靜岡縣唐蕃茄】雖然係用嚟間場嘅，但都好清甜多汁~

【八款壽司】象拔蚌、活八爪魚、池魚和瀨尿蝦都非常新鮮，放在以越光米煮成嘅壽司飯上，味道更佳~ 店員提我地要由左至右食起~

其餘四款壽司之中，我特別欣賞拖羅、馬糞海膽和三文魚籽，鮮甜到不得了，海膽入口即溶，三文魚籽又多又卜卜脆，高質到令我很有在日本旅行嘅感覺~

【赤味噌湯配卷物】赤味噌湯比平日的白味噌湯更鮮甜，令整餐飯再提升層次~

最後以【豆乳雪糕拼抹茶蕨餅】作結，蕨餅既煙韌又軟熟，食到啖啖的綠茶香味，再食一口香濃嘅豆乳雪糕，好幸福喔！

非常滿足和令人回味的一頓晚餐，食omakase最正嘅就係唔洗諗食咩，交晒俾師父安排就好了，因為師父發板每個菜式都會用上最時令和新鮮嘅食材去俾客人一個最佳嘅享受，而且每碟菜式嘅出場次序都好講究，期待下次再來試吓其他set~

鮨竜
紅磡必嘉街120號黃埔天地第三期百寶坊地下G9號舖